الجمعة , مايو 25 2018
الرئيسية / مقالات و آراء / ساعتها هيكون عيد ميلاد

ساعتها هيكون عيد ميلاد

بقلم : محمد ياسر عفيفي

ماحسيتش قبل كده إن انا متحمس ليوم عيد ميلادي .. حتى وأنا صغير لما كنت بحتفل بيه ، ماكنتش بحس بفرحه كبيره أو إن ده حدث يستوجب الفرحه .. لكن شئ جميل إن اللي حواليك يعبروا عن حبهم ليك بإحتفالهم معاك .. تاريخ اليوم من كل سنه ثابت ، لكن مع كل يوم من أيام عيد ميلادك بتكون حد تاني  غير اللي كان في اليوم اللي فات .. إحتفل باليوم ده لما تلاقي نفسك .. لما تعرف نفسك وسط زحمة الناس .. لما تعرف إزاى تحب نفسك وتقرب من نفسك وتعرف تفاصيلها وتعرف تتعامل معاها إزاى .. ممكن نقضي وقت كبير مشغولين بغيرنا ،لكن قليل لما بننشغل بنفسنا .. إحتفل لما تعرف إزاي تبقى قوي ومكتفي بنفسك علشان مفيش حاجه تكسرك .. إحتفل لما تلاقي حاجه تعيش علشانها ولما تسأل نفسك ” أنا عايش ليه ؟ ” تلاقي معنى لحياتك  .. إحتفل لما تكون وسط ناس بينكم وبين بعض حب حقيقي خارج عن أي حسابات ، لما تلاقي الإنسان اللي تكمل معاه باقي عمرك ، الإنسان اللي تحس إنه إنت  ؛ علشان لما اليوم ده يجي عليك تاني يكون فعلا عيد ميلاد ..

الفنان أحمد حلمي قال قبل كده في مقال ، يوم ميلادك هيكون فعلا عيد وتحتفل بيه لما نقول الحمد لله انك اتولدت علشان أفدت البشريه ، يوم ما نقول الحمد لله إنك إتولدت لأنك بقيت سند لأبوك وأمك .. احتفل بيه لما تكون شئ مفيد وساعتها إعمل ألف عيد ليوم ميلادك .

الشيخ وسيم يوسف لما إتسأل عن الموضوع قال : إحنا محتاجين نهتم بـ أيامنا وأعمارنا وطاعة ربنا والتقرب ليه ومعرفته ، ومحتاجين نفهم القرأن ونحفظه ونطبقه ف حياتنا ،  ومحتاجين نجاهد نفسنا ونرتقى في درحات الإيمان ونسخر جزء من وقتنا في خدمة الناس .. في الوقت ده نقدر نحتفل لأننا أنجزنا .

شاهد أيضاً

بواقى تصدير

بقلم / رشا كمال لماذا نصل لدرجة أن نختار من بواقى التصدير فى الامور المصيرية؟ ويجب أن ...

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *