هتعمل ايه لو مش مبسوط في شغلك ?!

مش مبسوط في شغلك… و الشغل اكيد مش تأدية واجب و خلاص، الشغل بيكون أسهل و أخف عليك بكتير لما تكون حابب الشغل حتى فأصعب الأوقات وضغوط الشغل كل ده بيهون طول ما بتوصل أو بتقرب حتى من اللي عاوزه بعدها و ساعتها شعور الانجاز بينسيك تعبك… ف لو مش حابب اللي بتعمله و مش عارف تستمتع بشغلك ولا تهاندله والشغل هو اللي سيطر عليك هيكون أصعب عليك بكتييير انك تستحمل ضغوط أو أي وقت صعب الشغل يقع فيه و انت معندكش طاقة بس قبل ما تفكر أن احسن حل انك تسيب الشغل، حاول تفكر شوية في كام حل الاول يساعدك تستحمل وضعك في الشغل وطبعا من غير تهور !

– اكيد في اسباب كتير جدا تخليك مش مبسوط فشغلك، ثقافة المكان اصلا قاسية شوية، شعور انك مش جاهز لمسئوليات الوظيفة، عدم تقدير لشغلك، عدم استغلال صح لمؤهلاتك، المرتب قليل، مشاكل مع زمايل الشغل، مش حابب مديرك أو هو مش حابك.. مع كل ده مهما كان بيئة وسوق العمل صعبة الاحسن تبقى فاكر انك محظوظ ان عندك وظيفة من الأساس من انك تتهور فقرار انك تسيب الشغل، فكر في وضعك، ان عندك مرتب وممكن تأمين وممكن commission أو فوايد تانية،، ده كله مش معناه انك كدة متعملش حاجة علشان تكون مبسوط فشغلك، لكن التفكير فكدة ع الاقل بيديك فرصة تبص لكل حاجة من منظور تاني.

– اعمل صداقات جديدة
مش لازم تحب كل واحد هتشتغل معاه لكن في شوية ممكن يكون سهل عليك تلاقي حاجة مشتركة للتفاعل معاهم.. خليك إيجابي مع اللي حواليك بلاش تشتكي من الشغل قدامهم لأن ممكن حد ينقل كلامك بطريقة سلبية ويحصلك مشاكل و حتى لو كلامك متنقلش انت في الحالتين بتحبط اللي حواليك ده غير أن محدش فيهم هيشوفك غير شخص شكاي مش شخص بيحل مشاكله يعني اعمل أصدقاء بايجابيتك مش بسلبيتك.

– حط التاتش الخاص بيك فمكان شغلك
لما تطبع شخصيتك في شغلك هتحس انك مرتاح اكتر، خلي فمكتبك صور ليك أو لعيلتك، حاجات مهمة أو ملهمة بالنسبالك، و الوان بتحبها، علشان الفوضى في المكان هتوترك.

– خليك إيجابي
اكيد الكلام اسهل من الفعل،، بس اتعلم تسهل الصعب يعني متجيش تفكر فكل همومك وانت شغال ده مش هيحللك اي مشكلة خاصة لو المكان مش مساعدك تبقى إيجابي خالص و صعب التأقلم فيه.
افتكر ان موقفك بعدم الرضا الظاهر لكل اللي حواليك ممكن تفضل منبوذ بسببه و اي مشكلة او تجاوزات هتحصل هتفضل وراك فكل مكان بعدها..

** لو كنت مش قادر تحافظ أو ترجع لموقفك الإيجابي،، قدم احسن ما عندك في الشغل و أبدأ اعمل خطة مسبقة علشان تسيب المكان بطريقتك انت اللي تليق بيك.. و افتكر ان الأسهل انك تلاقى شغل وانت لسة شغال ومحبوب في شغلك من العكس.

1 comments On هتعمل ايه لو مش مبسوط في شغلك ?!

  • ابراهيم توفيق

    ياريت طريقة الشرح وطرح الموضوعات وحلول المشكلات تكون بللغ العربيةالفصحى وليس بالعامية ، وبرجاء تغيير خط الكتابه للخطوط العادية
    وشكرا لكم

Leave a reply:

Your email address will not be published.